Roelie Lubbers-Hilbrands – Aovend over het Zudenveld in Slien in 2027!

Het is gauw zo wied, de Zudenveldtentoonstelling komp weer hen Slien. In 2026 is het jaorlijkse plattelandsevenement van 9 tot en met 12 juli in Oring (Odoorn). Op zundagmiddag 12 juli wordt daor het stokkie overdragen an Slien en dan begunt het bij
oes pas echt te kriebelen.
Het Zudenveld bestiet oet acht kernen, te weten Daolen, Zweel, Schonbeek, Coevern, Emmen, Hesseln, Oring en Slien. Alle jaor is de toonstelling in een aandere kern, en dat al sinds 1920! Ienmaol in de acht jaor is Slien dus an de beurt. In 2027 is het tien jaor leden dat die eer oes te beurt vuul. Die editie van 2017 was zeer geslaagd, der is nog veul over naoproot. Dat wilt wij volgend jaor, van 8 tot en met 11 juli 2027, vanzölf geern minimaal evenaren.
De overkoepelenden tentoonstellingsvereniging ‘Het Zuidenveld’ organiseert de keuringen met peerde, koenen, pony’s en schaopen. De plaotselijke commissie is verantwoordelijk veur de rest. De straoten wordt versierd deur de buurten, overal staot erebogen, der komp een optocht met fraaie praalwagens en vanzölf is der alle aovends feest in de tent. Tussen de acht Zudenveldkernen wordt een Zudenveldcompetitie holden met mooie underdielen met veur elk wat wils, sportief en cultureel.
De Stichting Plaatselijk Comité Zuidenveld Sleen en de Stichting Streekeigen Sleen organiseert in het naojaor een gezamenlijke aovend over ’t Zudenveld. Wij laot dan veul bewegende beelden en foto’s zien en vertelt verhalen over de rieke historie van dit geweldige mooie plattelandsevenement. Dat gef vast en zeker veul inspiratie veur volgend jaor. Wij zul op die aovend daorum ok kört veuroetblikken naor 2027.

Wij hoopt op veul volk!